16. des. 2010 (uppfært 10. jan 2012)

Er dýrt að fara til dýralæknis?

Sumum dýraeigendum finnst dýrt að fara með dýr til dýralæknis og rannsóknir og aðgerðir geta verið mjög kostnaðarsamar. Mjög mikilvægt er að gera sér grein fyrir því að dýralæknastofur eru einkareknar og almannatryggingar koma þar hvergi nærri. Til að geta rekið dýralæknastofu þarf fyrst og fremst að hafa dýralækni sem hefur farið í amk 6 ára háskólanám erlendis. Stofnkostnaður dýralæknastofu sem er búin helstu tækjum hleypur í dag á tugum milljóna. Um er að ræða sérhannaðar byggingar og margs konar tæki og útbúnað. Sem dæmi má nefna röntgentæki og framköllunarbúnað, ómskoðunartæki, blóðgreiningartæki, sérhönnuð skoðunar- og skurðstofuborð, sérhönnuð stálbúr, vél til að dauðhreinsa skurðáhöld og ógrynni af smááhöldum. Auk þess þarf tölvubúnað og sérstök forrit til að halda utan um alla starfsemina, tryggingar og öryggisvörslu. Svo eru allar einnota vörurnar, sprautur og nálar, saumþræðir, undirlegg undir dýrin og ræstingarvörur og fatnað fyrir starfsfólk.

Komu- og aðgerðagjöld þurfa að standa undir launum starfsfólksins, endurmenntun og rekstrarkostnaði. Ekki má heldur gleyma því að dýralæknaþjónusta er virðisaukaskattskyld en slíkt gildir t.d. ekki um læknisþjónustu á Íslandi. Fjórðungur af aðgerðagjaldi dýralæknisins rennur því beint í ríkissjóð.

Íslendingar hafa um langt skeið búið við mjög góða heilbrigðisþjónustu og eru vanir því að fá læknisþjónustu, allt upp í flóknar skurðaðgerðir, ókeypis. Við förum í segulómun og borgum nokkra þúsundkalla fyrir en raunkostnaður við slíka skoðun (sem okkur finnst sjálfsögð) er mjög hár ef allt er talið. Við getum farið með börnin okkar til sérfræðings að kvöldi til og borgað 1500 krónur fyrir. Því er kannski eðlilegt að sumum dýraeigendum bregði þegar þeir standa frammi fyrir háum reikningi á dýralæknastofu. Langflestir dýralæknar vildu helst af öllu geta veitt þjónustu án þess að taka krónu fyrir en veruleikinn er auðvitað ekki slíkur.

Mörgum þykir sjálfsögð mannréttindi að eiga gæludýr en ekki er hægt að horfa framhjá því að það er kostnaðarsamt og nauðsynlegt er að hugsa út í það áður en hvolpur eða kettlingur er fenginn inn á heimilið. Flestir hundar og kettir fara einu sinni á ári til dýralæknis, í eftirlit, bólusetningu og ormahreinsun. En ef um er að ræða veikindi eða slys þá geta rannsóknir og meðhöndlun hlaupið á tugum og jafnvel hundruðum þúsunda.

Slysa- og sjúkdómatryggingar
Flest tryggingafélög bjóða nú uppá slysa- og sjúkdómatryggingar fyrir gæludýr. Þær hafa bjargað mörgum lífum þar sem dýraeigendur hafa ekki alltaf efni á að reiða fram greiðslu fyrir meðhöndlun vegna óvæntra sjúkdóma eða slysa og neyðast stundum til að láta aflífa kæran fjölskylduvin. Við mælum hiklaust með að eigendur tryggi dýrin sín, það margborgar sig ef eitthvað kemur upp á.

Gjaldskrá Dýralæknastofu Suðurnesja

• Komugjald 4800
• Endurkoma 3200
• Hvolpur í fyrstu skoðun, örmerkingu, bólusetningu og ormahreinsun - 11.000 - 12.000 kr.

Komugjaldið er grunngjald og í því er innifalin heilbrigðisskoðun. Einnota vörur og lyf bætast við komugjald. Ef þarf að koma með dýrið í aðra skoðun, t.d. eftirlit vegna eyrnabólgumeðhöndlunar þá er tekið endurkomugjald. Ef framkvæma þarf smáaðgerðir í skoðuninni, t.d. taka sýni úr húðæxlum þá er greitt sérstaklega fyrir það.

• Blóðgreining (skoðun, blóðsýnataka, greining og einnota vörur) : 11.000-18.000

Á stofunni eru tvenns konar blóðgreiningartæki, annað gefur upplýsingar um blóðmynd (fjölda hvítra og rauðra blóðkorna) og hitt greinir ýmis lífefnafræðileg gildi sem segir til um starfsemi líffæranna. Það þarf sérstaka vökva og efni fyrir tækin og því er kostnaðarsamt að greina blóðprufur.

• Fress, gelding 8.500
• Læða, ófrjósemisaðgerð 14.900
• Ófrjósemisaðgerðir á hundum 23.000-45.000

Ekki er unnt að gefa upp fyrirfram nákvæmt verð á aðgerðum eins og geldingum og ófrjósemisaðgerðum á tíkum. Þónokkur mismunur er á lyfja- og efnisnotkun sem miðast fyrst og fremst við þyngd dýrsins. Í eina ófrjósemisaðgerð á stórri tík þarf t.d. 6-8 tegundir af lyfjum, 3-4 staka saumþræði (sem kosta á milli 1500 og 2000 kr hver), 2 pör af skurðhönskum, skurðdúk, grímur og hárnet og dauðhreinsaðar grisjur. Auk alls þessa fer tíkin heim í sjúkragalla eða með skerm svo hún nái ekki að sleikja sárið. Algengt verð fyrir tík þar sem allt er innifalið er um 40.000 krónur. Fast verð er á geldingum og ófrjósemisaðgerðum á köttum þar sem lyfja- og efnisnotkun er um það bil sú sama hjá öllum köttum.

• Tilboð

„Systkinaafsláttur“ er veittur fyrir tvö eða fleiri dýr sem eigandi kemur með samtímis t.d. í árlega skoðun. Þá er yfirleitt um að ræða 15% afslátt af komugjaldi fyrir dýr nr. 2 og 3 o.s.frv. Ef þarf að koma með mörg dýr í einu, t.d. got í fyrstu skoðun, bólusetningu og örmerkingu þá eru gerð sértilboð. Hafið samband við stofuna til að fá nánari upplýsingar.